السلام عليكم ورحمه الله وبركاته
أحب دايم اتطلع على الجزء هذا في المنتدى واللي بصراحه يشدني كثير رغم أني ما أشارك فيه كثير ,, وما أطرح رايي في المواضيع اللي يتم طرحها من قبل الأعضاء لأني عارفه اني راح اهاجم على رأيي ,,
وبصراحه اذا تبوني أقولها لكم في الوجه مالي خلق ومـــالي حيل أدخل في نقاشات مالها أول ولا تالي ,,
لأني من اللي شفته من ردود بعض الأعضاء ,, يسبون ويشتمون في خلق الله ويلعنوهم ,, طيب ليه وين مبادئ الإسلام اللي تدعي لها وانت واقف معاها من الأول وينها ,, هل الأسلام أمرك بالتعدي على اعراض خلق الله حتى لو كانو زناه !! هل الأسلام أمرك بلعن ذاك وشتم تلك وهتك أعراض الناس ,,
يا حبيبي حنا هنا (( نناقش ونحاور !! )) تعرف ايش يعني ؟؟ يعني ناخذ ونعطي واختلاف الرأي لا يغير من الود قضيه !!
ما تلاحظون انو كل العنواين اللي بهالقسم كلها لها دخل بالمرأه أنا ما أقول كلها بس أغلبها ..
إليكم ,,
هل هناك فتيات سعوديات يرغبن بالتخلي عن العباءة ,,
سؤال للشباب مااول مايلفت نظرك باالبنت,,
في العصر الحالي والخطير هل البكارة دليل على شرف البنت؟ ,,
جرائم الشرف: شرف لمن, وعار على من ,,
هل تتزوج وحده كنت على علاقه معها من قبل؟ ,,
سؤال مطروح للنقاش<<---- عاد هذا الموضوع شي ثاني ,,
هل يلفت نظرك كبنت,,
هاه شوفي هذا كم موضوع الحين ؟؟ سبعه مواضيع لها دخل بالمرأه بس في الصفحه الأولى ,,, هذا وأنا ما فتحت الصفحات الثانيه .. لأني متأكده انو اللست ما حتخلص وبجلس لحد بكرآآ
أوكي بتقولولي ,, يا غــاده هذي المواضيع عادي الناس تتناقش فيها اوكي انا معاكم ..
بس انتو للأسف مو جالسين تتناقشون انتو تسبون وتلعنون ..!! انتو لو العضو قدامكم حتاكلوه الا شوي !!
في الموضوع هذا ((هل هناك فتيات سعوديات يرغبن بالتخلي عن العباءة ,,))
ليش ذكرت انو اللي ما تلبس عبايه خارج السعوديه ما هي عفيفه و شرط انها تروح للديسكو والمراقص وتتفسخ عند كل الرجال !!
يعني بجد انتم متحيزين فقط للمرأه المتقبه في أوروبا والا أمريكا !!
طيب في كثير بنات ماهم متحجبين برآآ وأحلى منهم ما فيه أخلاق ودين أيمان ,, تشوفها اذا تصلي !! تصلي بخشوع وطمأنينه عليها طمأنينه المسلمين رغم أنها مو متحجبه ,,
يعني انتو عندكم انو علامه جوده الأيمان هي الحجاب !!
لا وألف لآ (( جأت لأتمم مكارم الأخلاق )) هذا قول الرسول .. لم يقل الحجاب بل قال الأخلاق
أتعرف ما معنى الخلق وخاصه الخلق العظيم (( وإنك لعلى خلق عظيم )) ؟؟
الخلق العظيم هو انك ما تتهجم وتتلفظ على الناس بألفاظ نابيه .. الخلق العظيم هو انك ما تتبلى على بنات المسلمين حتى لو كن غير متحجبات .. يا أخي حجابها هذا بينها وبين ربها !!
ربي هو اللي يحاسب مو انت ولا انت !!
أنا أدري انو عدم الألتزام بالحجاب حرآآم ,, لكني متأكده أنو الأتزام بالعبائه ليس حرآآم ليس حرأأم ليس حرأأم
ما فيها شي لو الوحده مثلا لمن تسافر خارج السعوديه انها تفك العبائه بس تلتزم بحجابها !!
ايوا صح انا برجع لكلمه ((البنت تحضر المراقص وتشرب الشراب وتتعاطى الحشيش حكايات وقصص نستحي عن ذكرها ومشاهد مخزيه...))
ايوا كمان اذا ما تدري انو في بنات محجبات يسوون هالأشياء .. الحجاب لا يدل على الأيمان .. وليس من سلك طريق الحجاب عرف طريق الأيمان
بل الأيمان هو الذي يدل على الحجاب ومن سلك طريق الأيمان عرف رضا الله وانك عاص ومرتكب لبعض الذنوب ,,
طيب أبسألك يا أخي !! هل دائما تصلي في المسجد ؟؟؟
لعلمك فقط ان اثم تارك صلاه الجماعه أضعاف أضعاف أثم المرأه غير المحجبه !! هذا لعلمك فقط!!
المرأه الغير محجبه تصلي فرضها اللذي فرضه الله عليها بأكمل وجه لأنها فقط تلبس الجلال وتصلي بالبيت
اما الرجل اللي لا يصلي صلاة جماعه وخاصه في المسجد لا يكون قد أدى فرضه الذي فرضه الله عليه بأكمل وجه بشكل تام
وانت عرف ان الصلاة هي عامود الأسلام !! وليس الحجاب !!
أتعجب من البنات اللي يقولون أنا والله البس عبايتي وين ما اروح وين ما اجي وهي في يدي 24 ساعه وما اروح مكان الا وهي معاي حتى في السفر !
طيب حبيبتي جزاكي الله خير على عملك هذا ان كان عملك خالصا لوجه الله مو بس عشان تسكتين أبوكي والا ااخوك ,, اللي ما تدرين ليش استعلن وسافر معاكم هالسفره !!
ووالله والله والله أنا شفت بعيوني بنات متحجبات لكنهن للأسف (( كاسيات عاريات ))
البنطلون السكيني ملصق على الجسم والتوب القصير اللي اذا جلست طلع كل شي !! كل شي ؟!!
وكمان لا يفوتكم الميك أب ,,, شي خرااافي والشال فوق راسها !
تدري يا أخي العزيز انو الشال هذا اللي مغطيه في شعرها محليها !! يا اخي احمد ربك انك ما شفت شعرها اللي مالها خلق تستشوره وتزين فيه يروووع واللهي يرووع !!
المرأه بزينتها وحياها سواء كانت محجبه او لم تكن ,, الأخلاق يا أخواني هي أساس التفاضل والتقوى بين الناس !
ليس التفاضل بين الناس هو بالحجاب!!
الحجاب بينها وبين ربها
نجي للموضوع الثاني ((هل تتزوج وحده كنت على علاقه معها من قبل؟ ,,))
دخلت انا !! وانبهرت بالكلام المكتوب ... ليست عفيفه ليست طاهره !! خاينه !!
احكام واحكام صدرت من ناس لا حكمة لديهم
انا لست مع او ضد انا انسانه محايده للموضوع وما احب اني اتكلم عنه بشكل تفصيلي الحين ..
بس انبهرت من رده فعل بعض الناس .. الذين بيقضفون ببنات المسلمين الطاهراات نعم نعم طاهراات وانت كان لها ماضي ,, من انت عشان تجي تتكلم وتقذف محارم المسلمين !! يمكن لها ظروفها ..
يا قارئ العزيز ,, !! هل صفحات حياتك كلها لم تندم عليها ,,!! ام ان هناك صفحات في حياتك وددت لو تمزقها و تحرقها !!
بقولك يا أخي العزيز ويا اختي العزيزه هذي خاينه هذي زانيه هذي فاسقه وهذي فاجره ,, تكون قد ارتكبت ذمبا أعظم من ذنبها هي ,,!!
وليش يعني الموضوع هل تتزوج وحده كنت على علاقه معها من قبل؟ ,,؟؟
ليش ما يكون هل تتزوجين انسانا كانت له علاقات من قبل !!!!! ليش ما يكون الخيار للأنثى ليش بس للذكر؟
حجاوبكم !! أنا كمان انســــانه ما ابي اتزوج واحد له علاقات محرمه قبلي ,, وهذه وجه نظري قد يكون لبعض الفتيات وجهاه نظر أخرى لكني أحترمها .. لكن القضيه هنا لست ارغب ام لا ارغب ,,
القضيه هنا ليش بس كل شي على راس البنت (( البنت وبس ))!!! ليش ؟؟
انا رافضه هالفكره وواقفه ضدها ,, وبصراحه يطيح من عيني الرجل اللي رؤية للحياه ضيقه وصغيره ,,
ويطيح من عيني الرجل الذي يرى ان المراه فقد عوره !!
أنا لست بعوره وما أقبل أني أسمى بهالمسى اللا انساني واللا أخلاقي
انا انسانه أمتلك من الحقوق الأنسانيه ما يمتلكه الرجل وأكثر نعم أكثر
فالأسلام كرم المرأه يا سعودييـــــــــــــــــــن كرمها !! ولم يحط من شانها ..
ولم يقل الأسلام أن المرأه من بيتها على بيت زوجها على المقبره !!
ولم يقل الأسلام ويقر على ان تنتهك حقوقي ,,
(( رفقا بالقوارير !! رفقا بالقوارير رفقا بالقوارير )) هذه كانت وصيه الرسول صلى الله عليه وسلم
(( يغلبن الكرام ويغلبهن اللئام )) اتعرف ما معنى هذا الحديث !! يالرجال ياللي تستقوي على مرأه ضعيفه !!!
ان المرأه اذا غلبتك فأنت كريم حليم وانك اذا غلبتها فأنت لئيم !!
هذا حديث الرسول صلى الله عليه وسلم
يالله يا شاطر قدر المراه حتى وان كانت ليست محجبه عاملها برفق عاملها بطيبه ,, عاملها بالأسلام !! دين المسامحه دين الرفق !!
ربما بمعاملتك الطيبه هذه تغير ما في قلبها ,,
للمعلوميه بس : بما اني بنت ,, ترى لمن اشوف اللي قدامي يصرخ ويهين اعانده !! بس لمن اشوفك حليم وطيب ما اعاند وبالعكس اسوي الشي عن طيب نيه ,, مو لأني غبيه !! ولا لأني ساذجه ,, فقط لأني انثى !! وفقط لأن امي هي عائشه وخديجه وحواء !!
انتو بس لو تقرون عن الرسول صلى الله عليه وسلم كيف يعامل زوجاته !! آآآآه لا مهند ولا غيره تعالى الرسول عنهم
في مره من المرات سمعت على التي في قصه عن الرسول صلى الله عليه وسلم ((كان كل يوم في الليل يطلع .. وعائشه رضي الله عنها بيذبحها الفضول تبي تعرف وين رايح .. وكانت مرره تغار عليه ,, فلحقت وراه والرسول ما عصب عليها بالعكس ابتسم على تصرفها )) يعني ياللي زوجتك تغار عليك وتتضايق من هالشي !! ترى عائشه تغار على الرسول والرسول عليه السلام ينبسط ويبتسم ,,
وياللي تقرف من زوجك وقت الحيض الرسول كان ينام على حظنها وكان ياكل من يدها !!
وياللي انت مشغول بالشركه والدوام .. ومو فاضي حق بيتك وزوجتك !!
الرسول كان ماسك شؤون دوله بحالها وكان ماسك أعظم الرسالات عشان يوصلها للناس ,, كان يفصل بين شوؤن الدعوه وشؤون بيته كان عليه السلام يقضي معاهم وقت كبير وكمان يقووم الليل ! انت متخيل كيف؟؟
لا تقول ما عندي وقت !! ترى اللي انت متزوجها واللي انت تحبها او اللي انت تكلمها تراها انسانه !!عندها احساس مشاعر !! عندها حب كبير يفيض داخل قلبها ,, بس تستناك وتستنى حنيتك !!
وللي يلعبون على بنات المسلمين وكمان اوجه للبنات اللي يلعبون على الشباب ّ ّّ !! خافوا بس ربكم
خافو الله !!
خافوا الله وصدقوني ما حتسوون الغلط !!
مره من المرات كنت جالسه مع ماما بالصاله ونتكلم عن الطلاق واشياء زي كذا ,,
غاده : طيب تروح بيتها !!
ماما: طيب واللي ما عندها أهل !!
غاده : مو مشكله عند اخوها او تشتري بيت !!! والا اقولك تبلغ الشرطه !! شلون يطقها وتسكت !!
ماما : ههههههههه بيت الطاعه !!
غاده : بيت الطاعه ؟؟ ايش هذا ؟
ماما: الحرمه اللي تطلع من بيت زوجها يجيبوها بالغصب بيت الطاعه !!
غاده : أول مره اسمع فيه ؟؟؟طيب ..... و ,,,,,تطلقو وما صار فيهم كذا !!
ماما: لأنو مو كل الناس متفهمين زي ازواجهم وبعدين مو كل الناس من البيئه اللي انتي عايشه فيها !!
غاده: طيب ,, ايش يسوون المساكين !! وين حقوقهم
ماما: غاده !! المرأه ما تعرف ايش حقوقها شلون تبينها تطالب فيها ,,
رحت المدرسه ((حصه الدين ))
** أستاذتنا جايه جديد من مكه واول مره تجي للرياض وما تدري وين الله حاطها كل شي حرام حتى اذا البنت تلبس بنطلون عند زوجها حراام ((بس اشوى فصلوها :q)) بس انا كنت بشوف تعرف حقوقها زي ما امي قالت والا شلون !! ابي افهم هالعقول وينها فيه !!
غاده : استاذه تعرفين انو اذا الحرمه يطقها زوجها وراحت بيت اهلها ويبغى يطالب فيها يروح لبيت الطاعه !!
الأستاذه : وشهوو ذا ؟؟
المهم : عدته لها الكلام
الأستاذه بكل وثوق : يحق له !!
فتحت عيوني انا وصاحباتي !! : شلون يحق له ! اقولك يضربها !! يضربها !!
الأستاذه بغباء: يضربها كم مره في اليوم يعني ؟
غاده: انشالله لو ضربها مره واحده !! ما يحق له انا مو عبده عند اهله !!
,,,,,وحده من البنات : جعل يده تنكسر
غاده : استاذه انتي من اي بيئه جايه باالهي !! رفقا بالقوارير رفقا بالقوارير !! شلون الشرطه تدخل البيت كذا شلون !! وين حقوق المرأه وين الأنسانيه !!
وحده من البنات : غاده !! الناس هنا ما تعرف حقوقها !! تبين انتي تجين تطالبين فيهم !!
غاده : ساره !! اي حق انسي انه حق !! هو جالس يتعدى عليها !!
ساره : اذا الحريم وهم الحريم راضيين باللي هم فيه !! والمجتمع راضي !! ليش توجعين راسك!!
غاده: افتح عقليت المجتمع !! اذا كل حرمه تعرف ايش لها واللي عليها صدقيني كل شي بينجح
ساره بيأس: احنا بمجتمع ذكوري وبس خلأآآص انسي !!
انسى !! كيف انسى !! كيـــف؟؟ حاولت انسى بس ما قدرت !! دامني عايشه بين هالسعوديين ؟؟ ليش كل وحده في مدرستي تحس السعودي متخلف !
السعودي مو متخلف بس لازم يفتح لي مخه شوي !!
يصير هاااي !! حتى لو مستواه المادي اقل من العادي .. ليش ما يصير غني باسلوبه وطريقه حواره !!
يمكن الناس اللي من مجتمعي فاهمين انا ايش بحكي عليه ,,, بس فيه كثير مجتمعات بصرآآحه قاهرتني !!
كتم وهضم لحريه المرأه حتى انها ما تشارك في نقاش قضيه او طرح رأي؟!
انا لا أعني بالحريه والتفتح الذهني هو فسخ الأدب والحياء لا بالعكس انا ادعو الى الدين الصحيح واللي لازم يطبق في السعوديه ,,دين الأسلام الأسلام فقط بكل وجوهه بصغيره وكبيره حلاله وحرامه على المرأه والرجل
الأسلام لا يلغي الأنثى ويعترف بالذكوريه كما يفعل السعوديون ,,
والسلام ختامي
منقوووووووووول
موضوع: المجتمع السعودي مجتمع ذكوري وليس مثالياّ 
الثلاثاء يونيو 03, 2008 1:38 pm
